Handina kuzvikumbira kana kuzvitsvaga
Ndakangozvarwawo mazviri zvikawira pandiri
Ndakachema nokuchemedzwa nazvo
ndakarerwa ndikave nezera
ndichingonzi, ‘sunga dzisimbe’
ndakazvidengezera
kukura kwakandiudza kuti ‘kurauone’
nyn’ambo nekukurukura hunge wapotswa
ndakaona chekuona ndikatsvukira
pasina wekuudza
ndaingozviudza ndega
‘kuwira pasi hakusi kuparara – simuka iwe’
Ndakangozvidengezera
Ndaumburudzwa, ndaisimuka ndichizunza guruva
Ndichizvinyararidza kuve pamanga chena
Nhema yakarivara zvokutorara haina kokutizira
chena inosvova kuziva mariva ayakateyerwa
isingaoneke miseve – inonanga pavete nhema
ndakangozvidengezera
chakachenjedza ndochakatanga – zvinonda veshasha
ndakasunga dzikasimba – hadzidambuke
rega zvipore akabva mukutsva
shiri yakabvuta rekeni – hupenyu hokoyo
zvino ndotamba muchongoyo nejikinya
ndakangozvidengezera
mupfungwa nemuhana muzere zvirere
zvomumusha umo ndakarerwa nokukurira
ndotarisa shure izvozvi chinongedzamberi
kwandakabva handikusiye hakusi kuseri
mumusha muhukama nekumba kwedu
ndoenda mberi ndakangozvidengezera
Pauline Chirata Mukondiwa grew up in Highfield, Harare in a family of nine. She has three children and two grandchildren. Pauline is a farmer and a keen waterwise gardener who enjoys travelling, meeting new people and getting to know their land, life and foods. Tasting indigenous cuisine is a must in her travels. Throw in some birdwatching and its bliss for Pauline. She loves a quiet space with a pen and a paper where she can dream.