Vamwe vanoti semvura misodzi
haina ruvara.
Asi yangu misodzi
inoyerera nemavara.
Vamwe vanoti zvinobatsirei kuyeredza musodzi
kana isingamudzosi?
Ndinorwadziwa asi handidembi.
Chandinogona kudetemba.
Hameno kumhepo ikoko kana muchigona kurirava
muzive kuti makandisiya ndakarivara.
Ndaedza kutsvaga zvinonditandadza
asi pfungwa dzinongoona kwenyu kutandadza.
Ndaisa zvinonaka mumuromo asi ndatadza
kumedza.
Dzamera
mumusoro wese ndangariro.
Kwete dzemariro
asi dzemagariro
atakaita hupenyu hwese.
Ndiyani aimbofunga kuti
kufambidzana, kufambirana, kufarirana
kufarisisa kufarisa, kufarira nokufara
kunozoputirwa kwese mujira jena
kovharirwa mubhokisi kodzikiswa mugomba kofushirwa muvhu
musi wekufa?
THERESA CHADENGA (TESS CHADENGA) was born in 1981 in Zimbabwe. She lives in the United Kingdom. She is a Social Worker and a mother. At a young age, Tess fell in love with writing. So, she has had a strong and passionate relationship with words all her life.
Tess is on Instagram, Facebook, Twitter, YouTube, TikTok, and Amazon as Tess_Chadenga / Tess Chadenga. If, on any of those platforms, you find her with only 12 followers, just know it is because one of her childhood prayers was: ‘I wanna be like Jesus.’ Please follow her because she is now praying for 12 million followers☺