Wakariga zhinji dzedu hama,
Pasi rose ukananzva semoto wesango,
Hasha dzako dzichitutuma sedoro ravirisa,
Sare tati kwaka mudzimba
Samakwari avona gondo.
Madhorobha akasara ati zi-i,
Migwagwa kushaya chinoti mve-e,
Mabasa akakuva semichero,
Iwe watitenhera semombe mudanga,
Uchiti wangofambafamba naye tsvemete!
Ndokusara zviso zvedu zvasuruvara.
Kunyange zvazvo wakavuya uri mutakati,
Rimwe divi wakavuya somudzidzisi,
Wakativigira vungwaru
Hwekugona kutandaravo murudo semhuri;
Nokushanda mabasa padandemutande ramasaisai;
Nokuvungana padandemutande ramasaisai;
Nokudzidza mumakirasi emumhepo;
Nokututsira vutsanana hwedu;
Nokuzvishandira mabasa edu okuzviriritira.
Tinokutenda iwe Corona
Novungwaru hwawakativigira uhwu!
Tavada Nhume akazvarwa mugore ra1989 kuChegutu. Kumusha kwake kuMberengwa, mudunhu reVutika munyika yaShe Maziofa. Akadzidza paVutika Secondary School kuMberengwa ikoko. Akazoita zvidzidzo zveHuman Resources Management neInstitute of Peole Management of Zimbabwe (IPMZ), huye zvidzidzo zvekuchenegetedzwa kwenharaunda, kudzivirigwa kwevashandi kubva kunjodzi dzepabasa nezvinokanganisa vutano hwavo. Tavada ane nduri dzake dzakatsikiswa mumabhuku anoti Tipindewo Mudariro, Dzinosvosva, Chainga Chenduri, Maungira eZimbabwe, Zambuko, Izwi reNharirire, uyewo padandemutande ramasaisai paMunyori Literary Journal, muThe Connect Magazine yakabatana neThe Gourd of Consciousness Poetry nepaWINZim Poetry neFiction Blog. Anewo nyaya pfupi yake yakatsikiswa mubhuku rinonzi Gangaidzanwa.