Padzakangoshongana
Chiriporipohlo takazivana
Zuva riya ratatanga kuvonana
Ndikayeuka kuti takambodanana
Pane imwe nhambo isiri nguri ino
Kune imwe nzvimbo isiri pasi pano
Kwatakanga tisina mboni
Patakaringana mukatikati momeso
Hana dzakati pa! mboni dzichimbundirana
Nyau nyau ropa kumanya sezvikova
Kuti zharara sechimera tichimerera
Mweya yedu ichihwanana
Ndikahwa ndichiri kukuda
Sokuhwavo kwako uchiri kundida
Ihwi rako rakamurudza moyo wangu
Ndokunounyika mumukoko wevuchi
Ndikanyongovera zvokusvinika gachichi
Zvokuti wakahosara wokanda shoko
Ndanguri ndaziva kuti ndiri wako
Huye kuti newe uri wanguvo
Zvakanga zvisingazibgwi nemboni
Pava paya wakatanga kunzvengesa chiso
Ndikaziva kuti maiwee zvadotanga!
Gwendurugwendugwe zvakare
Sezvawakambondiita paya
Munzvimbo iya isiri pano pasi
Panhambo iya isiri ino nguri
Patakanga tisina mboni
Rudo gwomene haguvandiki mudiwa wangu
Chisipiti chamakwenga omoyo wangu
Uchavanga ugovanga, uchivanda, kasi
Tichashonganazve patichazvagwazve
Ugondisvangaridza sesvengede
Mune imwe nzvimbo, pane imwe nguri
Kwatinenge tisina moyo, nyama namahwi
—Sokuya, kusina mboni
Samantha Rumbidzai Vazhure grew up in Masvingo. Her debut poetry collection, Zvadzugwa Musango, penned in chiKaranga, was translated to English – Uprooted. She has two published novels – Painting a Mirage, and Weeping Tomato, which won the NAMA for Outstanding Fiction in 2025. Her collection of poems, Starfish Blossoms, won the NAMA for Outstanding Poetry in 2023. She published her first children’s book, The Magic Greenhouse, in 2024. Samantha has also compiled a Zimbabwean women’s poetry anthology, Tesserae, and two short story anthologies by Zimbabwean writers, Turquoise Dreams and Brilliance of Hope. Find Samantha on: Facebook, X, Instagram, YouTube, Website